Qeveria miratoi vendimin për shpronësimin e disa pasurive të paluajtshme, pronë private, që preken nga realizimi i projektit “ndërtimi i linjës 110 kV Gjiri i Lalëzit – Fushë-Kuqe”.
Shpronësimi kryhet në favor të Operatorit të Sistemit të Transmetimit (OST), i cili do të përballojë të gjitha kostot financiare.
Pronarët do të kompensohen në vlerë të plotë për pasuritë e llojit “arë” dhe “ullishte”.
Vlera totale e shpronësimit arrin në 630 mijë lekë, ndërsa shpenzimet procedurale llogariten në 70 mijë lekë.
Pronarët e pasurive të shpronësuara do të kompensohen pasi të paraqesin dokumentacionin përkatës pranë OST-së.
Agjencia Shtetërore e Kadastrës dhe zyrat vendore përkatëse janë ngarkuar të nisin brenda 30 ditëve procedurat për hedhjen e gjurmës së projektit në hartën kadastrale dhe për regjistrimin e kalimit të pronësisë në favor të shtetit, në administrim të Ministrisë së Ekonomisë, Kulturës dhe Inovacionit, për llogari të OST sh.a.
Deri në përfundimin e këtyre procedurave, do të pezullohen të gjitha transaksionet që lidhen me pasuritë e shpronësuara.