Shkup, 21 dhjetor – Ali Ahmeti kujton ish-sekretarin e përgjithshëm të BDI-së, Abdilaqim Ademi, duke theksuar se kontributi i tij i madh dhe besnikëria ndaj partisë kanë ndihmuar që BDI të mbetet një forcë e fortë dhe e pathyeshme.
Ai lidh ditëlindjen e Ademit me mbajtjen e Kongresit të Pestë të partisë dhe nënvizon se puna dhe përkushtimi i figurave si Ademi janë pjesë e suksesit historik të BDI-së dhe rrugëtimit të shqiptarëve në Maqedoninë e Veriut drejt dinjitetit, barazisë dhe perspektivës evropiane.
Ahmeti shpreh respekt dhe kujtim personal për Ademin, duke theksuar se kontributi i tij nuk do të harrohet.
Reagimi i plotë:
Dje, në ditën kur organizata jonë politike mbajti Kongresin e Pestë, një ditë kjo e rëndësishme për të ardhmen e Bashkimit Demokratik për Integrim, ishte dita e ditëlindjes së njeriut që dha një kontribut të pashoq në konsolidimin dhe forcimin e partisë sonë, ish-Sekretar i Përgjithshëm i BDI-së, Abdilaqim Ademi.
I dashur mik, Abdilaqim, dje do të mbushje 56 vite jetë. Jeta jote, pa asnjë dyshim, ishte një jetë e bujshme, e mbushur me angazhim, përkushtim dhe ngjarje të mëdha, gjithmonë besnik ndaj idealeve tona të përbashkëta dhe në shërbim të plotë e pa ekuivoke të BDI-së.
Në ditëlindjen Tënde, partia jote mbajti Kongresin e Pestë dhe vazhdon të mbetet një parti e pathyeshme, pavarësisht goditjeve të paskrupullta nga të gjitha anët. BDI vazhdon rrugëtimin e saj me përgjegjësi historike dhe vizion të qartë për të ardhmen e shqiptarëve në Maqedoninë e Veriut.
Ditëlindjet e Tua, bashkë me kujtimin për Ty, janë hallka që lidhet natyrshëm me sukseset historike të BDI-së dhe me rrugëtimin e popullit shqiptar drejt dinjitetit, barazisë dhe perspektivës evropiane!
Nuk të harrojnë shokët dhe miqtë, nuk të harrojnë bashkëveprimtarët. Nuk të harroj as unë, miku yt.
Lavdi jetës dhe veprës sate!