Kryetari i Partisë Demokratike Sali Berisha, pas vendimit të Gjykatës së Posaçme Kundër Korrupsionit dhe Krimit të Organizuar (GJKKO), për lirimin nga masa e sigurisë “arrest shtëpie”, iu drejtua selisë së partisë, ku u prit nga një numër mbështetësish.
Gjatë fjalës së tij, ish-kryeministri Berisha e cilësoi këtë ditë si ditë të mirë për opozitarët, e shtoi se sot nuk fitoi ai, por fitoi ligji dhe Kushtetuta.
“Piramida me e madhe e mashtrimit në historinë e drejtësisë europiane të Pasluftës së Dytë Botërore mori sot goditjen më fatale! Sot, Shqipëria u ndriçua nga rrezet e para të rikthimit të pandalshëm të demokracisë! Sot është dita kur monstrat e demokracisë, Edi Rama dhe Xhorxh Soros dështuan përfundimisht. Dështuan në tentativën e tyre për të shkatërruar opozitën shqiptare në grushtin e shtetit që i bënë ndaj saj. Sot, ne së bashku, sakrifica e 330 ditëve, mundi i 3 viteve, triumfoi dhe u shpërblye”, tha Berisha në fjalën e tij para mbështetësve demokratë që ishin mbledhur jashtë ambienteve të selisë blu.
Ish-kryeministri Berisha prej datës 30 dhjetor të vitit të kaluar ndodhej në “arrest shtëpie”, pasi refuzoi që të zbatonte masën “detyrim paraqitje” ndaj tij, duke e konsideruar si antikushtetuese.
Sali Berisha, aktualisht kryetar i Partisë Demokratike, akuzohet nga SPAK për kryerjen e veprës penale “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim për çështjen e privatizimit të ish-kompleksit “Partizani”.
Berisha tha se ai u arrestua se “mbrojti interesin kombëtar, u arrestua pikërisht se ishte antikorrupsioni i shqiptarëve”.
“Sepse provat e vetme që gjetën ishin bamirësi të vajzës sime ndaj fëmijëve me aftësi ndryshe dhe pagesat që ajo kishte bërë për shërbime mjekësore për mua, të gjitha të deklaruara. U përpoqën të blejnë heshtjen e Sali Berishës, po këtu tani u bënë qesharakë me veten e tyre”, tha Berisha.
Sipas Berishës “kërkuan ta zhysin Shqipërinë në terrin e narkodiktaturës, por ne ndriçuam çdo natë në Rrugën e Shpresës”.
“Dhe nga sot, dritën e kësaj rrugë do ta përhapim, sepse Shqipëria duhet të jetë vend i shpresës dhe kombi ynë duhet të jetë kombi i shpresës dhe jo kombi i krimit dhe i narkotrafikut”, u shpreh Berisha.
Berisha shtoi se “me rikthimin e Partisë Demokratike në pushtet jemi më pranë se kurrë në misionin tonë për shpëtimin e Shqipërisë”.
Në përmbyllje të fjalimit të tij, Berisha i bëri thirrje kryeministrit Edi Rama, të cilin e akuzoi si, “autorin kryesor të këtij grushti shteti që iu bë opozitës shqiptare”, që të krijojë qeverinë teknike.
“Krijo qeverinë teknike, se mosbindja civile është gati në radhë”, tha Berisha.