Shqipëria shënoi një vit të mbushur me aktivitete diplomatike të rëndësishme dhe hapa të qenësishëm drejt integrimit në Bashkimin Evropian (BE) gjatë 2024-ës.
Diplomacia shqiptare ka luajtur një rol të dukshëm në forcimin e marrëdhënieve ndërkombëtare, promovimin e interesave kombëtare dhe avancimin drejt një pozicioni të fuqishëm në skenën rajonale dhe globale.
Viti 2024 ka shënuar arritje të rëndësishme për politikën e jashtme shqiptare, duke përfshirë, jo vetëm hapjen e negociatave për anëtarësimin në Bashkimin Evropian, por dhe forcimin e marrëdhënieve me partnerët strategjikë, rritjen e angazhimeve në organizatat ndërkombëtare dhe forumet shumëpalëshe, mbrojtjen e interesave të shqiptarëve kudo në botë përmes modernizimit dhe efikasitetit të shërbimeve ndaj tyre, konsolidimin e imazhit të vendit si faktor stabiliteti rajonal, por dhe si ofrues i potencialeve për investime të huaja dhe shkëmbime ekonomike e tregtare.
Në funksion të një diplomacie sa më efektive dhe nevojave për zgjerimin e aktivitetit diplomatik e konsullor është rritur prania në rajon dhe shtete të tjera duke përfshirë ambasadat e reja në Kiev dhe Baku, si dhe konsullatat e hapura në Strugë dhe Ulqin, që janë hapa të rëndësishëm për të mbështetur qytetarët shqiptarë dhe për të avancuar interesat e Shqipërisë në arenën globale.
Konferencat Ndërqeveritare me BE
Një ndër arritjet më të rëndësishme për Shqipërinë gjatë vitit 2024 ishte përparimi në procesin e negociatave për anëtarësim në BE.
Konferenca e Parë Ndërqeveritare mes Shqipërisë dhe Bashkimit Evropian u mbajt në Bruksel, më 19 korrik 2024 duke shënuar hapjen e negociatave.
Më 15 tetor, Shqipëria çeli zyrtarisht grup-kapitullin e “Themeloreve” duke mbajtur Konferencën e Dytë Ndërqeveritare me Bashkimin Evropian, duke përfshirë:
Kapitullin 23: Gjyqësori dhe të Drejtat Themelore, që adreson reformat në sistemin gjyqësor, mbrojtjen e të drejtave të njeriut dhe luftën kundër korrupsionit.
Kapitullin 24: Drejtësia, Liria dhe Siguria, me fokus te çështjet e sigurisë, migracionit dhe bashkëpunimit në luftën kundër krimit të organizuar.
Ky hap pasqyron përpjekjet e qëndrueshme të qeverisë shqiptare për të përmbushur reformat kyçe dhe për të ndërtuar një kornizë të qëndrueshme për sundimin e ligjit.
Shqipëria është e para ndër vendet kandidate që hapë negociatat e anëtarësimit sipas metodologjisë së rishikuar të zgjerimit.
Grupi i parë i kapitujve mbulon reformat themelore, duke i hapur rrugën fillimit të negociatave për grupe të tjera. Progresi në këto reforma do të përcaktojë gjithashtu ritmin e përgjithshëm të negociatave.
Gjithashtu më 17 dhjetor, Shqipëria mbajti Konferencën e Tretë Ndërqeveritare me Bashkimin Evropian, duke hapur grup-kapitullin 6, atë të Marrëdhënieve me Jashtë.
Ky grup-kapitull përmban dy kapituj: Kapitulli 30 – Marrëdhëniet e jashtme dhe Kapitulli 31 – Politika e jashtme, e sigurisë dhe e mbrojtjes.
Konferenca e Ambasadorëve, “Tirana Diplo 2024” u mbajt në Tiranë
Nga data 26 deri më 28 gusht, në Tiranë u mbajt Konferenca e Ambasadorëve “Tirana Diplo 2024”, një ngjarje vjetore që mblodhi ambasadorët dhe konsujt shqiptarë nga e gjithë bota.
Kryeministri Edi Rama dhe ministri për Evropën dhe Punët e Jashtme, Igli Hasani në këtë konferencë theksuan rëndësinë e diplomacisë ekonomike, reformat në shërbimin diplomatik dhe prioritetet për integrimin evropian.
Konferenca e Ambasadorëve u rikthye pas tetë vitesh, ku përgjatë tri ditëve të zhvillimit në Tiranë u diskutua mbi sfidat dhe mundësitë e diplomacisë shqiptare, si dhe strategjitë e Shqipërisë mbi sigurinë, gjeopolitikën e rajonit, ekonominë, turizmin, kulturën dhe prioritetin kryesor, integrimin në Bashkimin Evropian.
Gjithashtu, u diskutuan sfidat në politikën e jashtme, si dhe nevoja për të thelluar marrëdhëniet me vendet e Ballkanit Perëndimor.
Mbështetja për Kosovën dhe stabiliteti rajonal
Shqipëria ka luajtur një rol aktiv gjatë 2024-ës në mbështetjen e Kosovës për njohjen ndërkombëtare dhe anëtarësimin në organizata ndërkombëtare.
Në takime të ndryshme gjatë vitit, përfaqësuesit shqiptarë kanë theksuar rëndësinë e një qasjeje të koordinuar për sigurinë rajonale dhe stabilitetin në Ballkan.
Në këtë kuadër, më 20 dhjetor u mbajt në Prishtinë edhe seanca e përbashkët plenare mes Kuvendit të Shqipërisë dhe atij të Kosovës.
Në këtë seancë mbajtën fjalën e hapjes kryetarët e dy Kuvendeve, Elisa Spiropali dhe Glauk Konjufca.
Mbledhja gjithashtu u përshëndet nga presidentja e Republikës së Kosovës, Vjosa Osmani si dhe nga dy kryeministrat, Edi Rama dhe Albin Kurti.
Gjithashtu në këtë seancë mbajtën një fjalë edhe kryetarët e grupeve parlamentare.
Në fund të seancën deputetët miratuan një deklaratë të përbashkët mes dy Kuvendeve, të Shqipërisë dhe Kosovës.
Kjo mbledhje e përbashkët në Prishtinë ishte në vijim të mbledhjes së parë të 27 nëntorit të vitit 2022 në Tiranë.