Deputeti i koalicionit VLEN, Adnan Azizi, ka reaguar ndaj akuzave të fundit që, sipas tij, vijnë nga radhët e BDI-së dhe individëve me mentalitet të vjetër politik, duke theksuar se shqiptarët nuk mund të manipulohen më me taktikat e shërbimeve të vjetra jugosllave.
Në një status të publikuar në rrjetet sociale, Azizi deklaron se “BDI dhe UDB-at brenda ende jetojnë me iluzionin se duke hedhur mjegull syve do të verbojnë shqiptarët.”
Sipas tij, gjithçka që është pjesë e një strategjie të dëshmuar anti-shqiptare, përpiqet t’i vishet koalicionit VLEN apo aktorëve të tjerë që nuk janë pjesë e kësaj skeme. Ai thekson se shqiptarët tashmë e njohin mirë lojën e vjetër të propagandës.
“E gjithë loja e UDB-së ka qenë që bëmat e saj t’i marrë përsipër dikush tjetër, ndërsa ajo vetë të shijojë rezultatin nga distanca.”
Azizi është i prerë se ato kohëra kanë marrë fund dhe se “bota serbe” sot ekziston vetëm brenda kufijve të vet.
“Patericat jashtë kufijve nuk kanë më pushtet!”, shkruan ai.
Deputeti i VLEN përmbyll reagimin e tij me një mesazh të drejtpërdrejtë ndaj atyre që përhapin akuza e shpifje.
“Përderisa ju akuzoni me shpifje, ne ua dëshmojmë të kundërtën me vepra e fotografi! Ja brenda kujt që dron Serbia!”