Shkup, 22 maj – Nënkryetarja e Kuvendit të Republikës së Maqedonisë së Veriut, Vesna Bendevska, u takua me zëvendësministrin e Punëve të Jashtme të Komitetit Qendror të Partisë Komuniste të Kinës, Çen Xhou, i cili po qëndron për vizitë në vend.
Në takim, siç njoftoi pres shërbimi i Kuvendit, morën pjesë edhe deputetja Daniella Belimova dhe zëvendëssekretari i përgjithshëm i Kuvendit, Bojan Stojanoski, gjatë të cilit u shkëmbyen mendime për marrëdhëniet midis dy vendeve, për bashkëpunimin e deritanishëm në disa fusha dhe për mundësitë për thellimin e tij.
Zëvendësministri Xhou u dakordua me vlerësimin e nënkryetares Bendevska se marrëdhëniet midis Republikës së Maqedonisë së Veriut dhe Republikës Popullore të Kinës janë bazuar në dy parime: respekti i ndërsjellë dhe mbështetja reciproke, që nga fillimi i pavarësisë së vendit tonë.
Nënkryetarja Bendevska i theksoi angazhimet strategjike të vendit tonë, si anëtare e plotfuqishme e NATO-s dhe kandidate për anëtarësim në BE.
Lidhur me marrëdhëniet dypalëshe, Bendevska theksoi se, megjithëse po arrijmë bashkëpunim të suksesshëm në shumë fusha, siç janë arsimi, turizmi, shëndetësia dhe kultura, ekzistojnë mundësi për forma më të larta të bashkëpunimit ekonomik, përkatësisht për intensifikimin dhe pasurimin e shkëmbimit midis dy vendeve.
Theksi u vu gjithashtu edhe në mundësitë për intensifikimin e bashkëpunimit parlamentar, duke përfshirë shkëmbimin e përvojave të grupeve të caktuara të synuara, siç janë të rinjtë, gratë, organizatat civile ose mediat.
Në këtë kontekst, zëvendëssekretari i përgjithshëm Stojanoski theksoi kapacitetet e Shërbimit të Kuvendit të RMV-së, duke theksuar se shkëmbimi i mendimeve dhe njohurive është i mirëseardhur, veçanërisht në drejtim të përmbushjes së drejtimeve strategjike të Dhomës Ligjvënëse.