Breshëri ka dëmtuar prodhimet bujqësore në fshatin Xibër Murrizë, të bashkisë Mat.
Dëmet shtrihen në dhjetra hektarë, të mbjella kryesisht me perime.
Kanë mjaftuar vetëm 15 minuta, që banorët e fshatit Xibër Murrizë të mbeten pa prodhimet e tyre bujqësore këtë sezon.
Dhjetra familje të këtij fshati, të cilat jetën e tyre e kanë të ludhur me bujqësinë, pas një stuhie breshëri, i kanë parë të mbjellat e tyre, të dëmtuara dhe të rënë përtokë.
Dëmet janë shtrirë në dhjetra hektarë me perime, kryesisht domate dhe kultivarë të tjerë, të cilat banorët i cojnë pjesërisht në treg për shitje dhe pjesërisht për nevojat vetjake.
Sigurimi i tokave përmes kompanive private është i papërballueshëm nga vetë fermerët dhe tashmë e vetmja shpresë mbetet ndihma që mund të ofrojë drejtoria rajonale e bujqësisë në bashki.
Njësia administrative, Xibër Murrizë i përket qarkut të Dibrës, 37 km larg kryeqyetit, nëse udhëton nga rruga e Arbrit. Banorët thonë se një breshër i tillë nuk ishte parë për më shumë se 20 vite.