KFOR përmes një reagimi publik ka reaguar ndaj aksionit të ditës së hënë në veri të Kosovës, ku u mbyllën gjashtë njësi të “Bankës Postare Kursimore” të Serbisë.
KFOR-i thotë se nuk ka qenë i përfshirë në këtë operacion nga policia e Kosovës, transmeton Telegrafi.
Tutje, KFOR shton se pret konsultime me kohë për çdo veprim të Policisë së Kosovës apo Forcave të Sigurisë së Kosovës që mund të ndikojnë në sigurinë rajonale.
“KFOR-i vazhdon të mbështesë dialogun Beograd-Prishtinë të lehtësuar nga BE-ja sigurimi i kornizës së sigurisë të nevojshme për të ecur përpara diplomacisë. Kjo është mënyra e vetme për të zgjidhur çështjet e pazgjidhura dhe për të arritur zgjidhje që respektojnë të drejtat të të gjitha komuniteteve”, theksohet në njoftim.
Gjithashtu theksohet se KFOR-i vazhdon të zbatojë mandatin e tij – bazuar në Këshillin e Sigurimit të OKB-së.