Shkup, 3 shtator – Deputetë të VMRO-DPMNE-së me propozim-ligj për formimin e shkollës së mesme policore. Projektligji parashikon që shkolla të jetë dyvjeçare, viti i tretë dhe i katërt, dhe do të mbledhë nxënësit që dy vitet paraprake kanë mbaruar në shkolla të tjera të mesme duke përmbushur kushtet paraprake sikurse gjendja e rregullt psikofizike, të njohin gjuhën maqedonase dhe të mos paraqesin rrezik për shtetin.
Përzgjedhjen e kandidatëve e bën Ministria e Brendshme, e cila në fund të ciklit të shkollimit policor do të certifikojë nxënësit me diploma.
Për deputetin socialdemokrat, Oliver Spasovski, kjo është e papranueshme dhe antikushtetuese, pasi që Ministria e Brendshme nuk ka kompetenca të tilla.
“Nuk ekziston kompetencë e Ministrisë së Brendshme që të merret me veprimtari arsimore. Pyesim se si me një ligj të tillë mund t’i japim kompetenca ministrit të brendshëm. Një shkollë e mesme ka statusin e personit juridik dhe regjistrohet në regjistrin qendror. Ne në këtë ligj nuk kemi paraparë se kjo shkollë e mesme policore do të jetë subjekt juridik, por është pjesë përbërëse e Ministrisë së Brendshme, pa pasur drejtor të shkollës, këshill të shkollës, siç e parashikon ligji për arsim të mesëm.”, – deklaroi deputeti i LSDM-së, Oliver Spasovski.
Në ligj thuhet se paralelisht shkollës policore, trajnimi i policëve të ardhshëm do të bëhet edhe në akademinë policore, që për opozitën është alogjike.
Regjistrimi i nxënësve do të bëhet në maj të vitit të ardhshëm për vitin e ardhshëm shkollor 2026-2027, ndërkaq shkolla do të jetë e pozicionuar në qendrën aktuale për trajnimin e policëve në Idrizovë.
Votimi për këtë projektligj pritet të ndodhë në seancën tjetër plenare, për shkak të nevojës së votimit të dyfishtë, gjegjësisht votimit me Badinter.