Shkup, 7 nëntor – LSDM duhet të ndërtojë një strategji të qartë se si ta fitojë sërish besimin e qytetarëve në të ardhmen dhe të jetë pjesë e pushtetit, por jo si partnere koalicioni e VMRO-DPMNE-së, tha Jani Makraduli.
Makraduli theksoi se LSDM, si parti shtetformuese, duhet të ofrojë një plan për të fituar besimin e qytetarëve dhe për të qenë bartëse e politikave në Qeveri.
“Rezultati i zgjedhjeve është i dobët. Duhet të përgatitet një raport serioz brenda partisë dhe të analizohet si dhe pse LSDM ka arritur në këto shifra. Në atë raport duhet të përfshihet edhe një analizë e rezolutës për ‘vijat e kuqe’, e promovuar para fushatës, dhe të shihet cili ka qenë kontributi i saj,” tha Makraduli.
Ai shtoi se LSDM-së i duhet një vizion politik i sinqertë, realist, me emocione, pasion dhe ndershmëri.
“Nuk jam ftuar në takimin në selinë e partisë në Bihac. Disa kandidatëve u ofrova ndihmë, por fatkeqësisht nuk ndjenë nevojë të marrin ndonjë këshillë. Megjithatë, nuk bëhet fjalë për zgjidhje personale, por për nevojën që partia të ketë politikë të qartë,” tha Makraduli.