Komisioneri Shtetëror i Zgjedhjeve, Ilirjan Celibashi zhvilloi një takim me përfaqësues të “Qëndresa Qytetare” për të diskutuar në detaje mbi sfidat dhe praktikat më të mira në monitorimin e përdorimit të burimeve shtetërore gjatë proceseve zgjedhore.
Gjatë këtij takimi, u trajtuan një sërë çështjesh kyçe që lidhen me identifikimin, parandalimin dhe adresimin e shkeljeve të mundshme që përfshijnë burimet shtetërore, me qëllim garantimin e një procesi zgjedhor të ndershëm dhe transparent.
Në takim u diskutua mbi rritjen e efektivitetit të raportimeve të rasteve të abuzimit për të forcuar mekanizmat e hetimit administrativ ndaj institucioneve publike.
Gjithashtu u theksua rëndësia e një bashkëpunimi të ngushtë dhe të qëndrueshëm me aktorët e shoqërisë civile, duke vlerësuar rolin e tyre si partnerë të rëndësishëm në mbrojtjen e integritetit të proceseve zgjedhore.
Përfaqësuesit e Qëndresës Qytetare ndanë gjetjet e tyre nga monitorimi i zgjedhjeve të mëparshme, duke vënë theksin te nevoja për një ndërgjegjësim më të gjerë publik mbi raportimin e abuzimeve dhe për zhvillimin e kapaciteteve institucionale për të adresuar këto raste me shpejtësi dhe efikasitet.
Ata gjithashtu propozuan disa ide konkrete për përmirësimin e transparencës dhe llogaridhënies në përdorimin e burimeve shtetërore gjatë zgjedhjeve.