Shkup, 19 maj – Drejtoria e Doganave luan një rol të rëndësishëm në zbatimin e axhendës së reformave drejt anëtarësimit të plotë në BE, me rezultate të jashtëzakonshme që tashmë janë të dukshme në një kohë të shkurtër. Ky është epilogu i përbashkët nga takimi i sotëm i zëvendësshefes së misionit në Ambasadën e SHBA-së në Shkup, Nikoll Varns dhe drejtorit të Drejtorisë së Doganave, Boban Nikollovski, së bashku me ekipet.
“Rezultatet e jashtëzakonshme që keni arritur në një kohë të shkurtër janë një dëshmi e rëndësishme e punës së jashtëzakonshme të Drejtorisë së Doganave. Ju keni një rol të rëndësishëm në ruajtjen e sigurisë dhe përmirësimin e situatës ekonomike si një aspekt i rëndësishëm në tërheqjen e investimeve të huaja direkte. Në 18 muajt e ardhshëm zbatimi i axhendës së reformave drejt anëtarësimit të plotë në BE do të jenë vendimtare, ku Drejtoria e Doganave ka një rol të rëndësishëm, por do të jetë gjithashtu nën presion të madh për të dhënë rezultate në fushat e ekonomisë, sigurisë, por edhe në luftën kundër korrupsionit. Metoda juaj e rezultateve e bazuar në ekip dhe bashkëpunimi i shtuar në nivel kombëtar dhe ndërkombëtar janë tashmë të dukshme, dhe ju keni mbështetjen tonë të plotë në përmbushjen e qëllimeve tuaja strategjike”, tha Zëvendësshefja e Misionit në Ambasadën e SHBA-së në Shkup, Nikoll Varns.
Drejtori Boban Nikollovski shprehu mirënjohje ndaj Shteteve të Bashkuara të Amerikës për mbështetjen e vazhdueshme, duke shprehur kënaqësinë për nderin e një vizite të dytë zyrtare në Ambasadën e SHBA-së brenda një kohe të shkurtër, si konfirmim i bashkëpunimit të shkëlqyer.
Në takim, të dyja palët diskutuan për tregtinë, si dhe rezultatet e Drejtorisë së Doganave në fushën e luftës së krimit dhe korrupsionit, mbledhjen e të ardhurave në Buxhet, si dhe investimet dhe masat e zbatuara nga drejtoria me qëllim integrimin e përshpejtuar në tregun e vetëm të BE-së.
“Në nivel operativ, kemi forcuar kontrollet, gjë që na ka mundësuar të arrijmë mbledhje reale dhe të vërtetë të të ardhurave, si dhe përparim të konsiderueshëm në luftën kundër krimit të organizuar. Që nga fillimi i këtij viti, deri në prill, Drejtoria e Doganave ka mbledhur të ardhura në shumën prej 41.2 miliardë denarësh, që është 4.1 për qind ose 1.6 miliardë denarë më shumë se në të njëjtën periudhë të vitit të kaluar. Gjatë kësaj periudhe, janë bërë 173 raste sekuestrimi, ose 84 për qind më shumë se në të njëjtën periudhë të vitit të kaluar kur janë bërë 94 raste sekuestrimi. Kemi zbuluar rrjete serioze kriminale, dhe deri në prill, Departamenti i Hetimeve i Sektorit të Kontrollit dhe Hetimeve ka ngritur 72 kallëzime penale kundër 39 personave juridikë dhe 138 personave fizikë në Prokurorinë Themelore Publike dhe në Prokurorinë Themelore Publike për Krim të Organizuar dhe Korrupsion”, tha drejtori Nikolovski, duke theksuar se Drejtoria e Doganave tashmë njihet si një institucion që jep rezultate ekipore dhe se do të vazhdojë të punojë në këtë mënyrë edhe në të ardhmen, të gjitha me qëllim të arritjes së rezultateve edhe më të mira.