Shkup, 9 qershor – Në këtë 9 qershor, kryetari i kuvendit të ASH-së, njëherësh zëvendëskryeministri Arben Fetai ka kujtuar një nga momentet më të rëndësishme për paqen dhe sigurinë në Ballkanin Perëndimor, nënshkrimin e Marrëveshjes së Kumanovës, e cila i dha fund luftës në Kosovë dhe ndali fushatën e spastrimit etnik të regjimit të Millosheviqit.
“Ky ishte një moment historik që hapi një kapitull të ri për lirinë, demokracinë dhe zhvillimin e rajonit tonë”, thuhet në deklaratën e zëvendëskryeministrit Fetai.
Ai ka nderuar të gjithë ata që sakrifikuan për lirinë dhe dinjitetin njerëzor, duke shprehur mirënjohje të veçantë për partnerët ndërkombëtarë, veçanërisht NATO-n dhe Shtetet e Bashkuara të Amerikës që qëndruan në anën e drejtë të historisë.
Në deklaratë theksohet edhe roli i Maqedonisë së Veriut si vend nikoqir i Marrëveshjes së Kumanovës dhe si strehë për rreth gjysmë milionë refugjatë nga Kosova, duke dëshmuar kështu angazhimin e saj për paqe dhe stabilitet rajonal.
“Ndërtimi i paqes është proces i përditshëm që kërkon përgjegjësi dhe përkushtim të vazhdueshëm ndaj vlerave demokratike dhe bashkëpunimit rajonal. Ky është angazhimi ynë i përhershëm”, ka përfunduar zëvendëskryeministri Fetai.