Kancelari i Gjermanisë Olaf Scholz mbodhi sot në një drekë pune krerët e qeverive të gjashtë vendeve të Ballkanit Perëndimor, në kuadër të Samitit të Procesit të Berlinit 2024.
Pjesëmarrës në këtë drekë pune bashkë me Kryeministrin Edi Rama janë edhe kryeministrat e Bosnjë-Hercegovinës, Malit të Zi, Kosovës, Maqedonisë së Veriut dhe Serbisë.
Pak para fillimit të drekës së punës, kryeministri Rama ndau në rrjetet sociale pamje nga zyra e kancelarit gjerman, ku duket statuja e një shqiponje.
“Kur shqiponja të pret për drekën e punës në zyrën e Kancelarit të Gjermanisë”, shkruan Rama krahas fotos.
Samiti i Procesit të Berlinit 2024 fokusohet në bashkëpunimin dhe tregun e përbashkët rajonal dhe axhendën e gjelbër për Ballkanin Perëndimor.
Në takim pritet po ashtu të nënshkruhet një deklaratë e përbashkët për një plan të ri veprimi për një treg të përbashkët rajonal dhe një marrëveshje për rritjen e aksesit në institucionet e arsimit të lartë në rajon.
Më herët, Kryeministri Rama ndau dhe pamje nga momenti i fotos familjare dhe punimeve të Samimit të Procesit të Berlinit, që po zhvillohet në kryeqytetin e Gjermanisë.