333
Instat do të publikojë nesër të dhënat zyrtare të Censit 2023, duke i dhënë në këtë mënyrë një përgjigje zyrtare se sa është numri i rezidentëve në Shqipëri.
Instituti i Statistikave ka njoftuar në rrjetet sociale nxjerrjen e të dhënave gjatë ditës së nesërme, rreth 8 muaj pasi u bë identifikimi i plotë i popullsisë dhe banesave.
Censi i Popullsisë dhe Banesave 2023 është Censi i 12-të, që kur Shqipëria u shpall shtet i pavarur në vitin 1912, ku Censi i parë u krye në vitin 1923. Që prej Censit të vitit 1989, metodologjia e tij ka ndjekur gjithnjë e më shumë rekomandimet ndërkombëtare për kryerjen e Censit.
Censi i Popullsisë dhe Banesave ofron të dhëna mbi numrin zyrtar të popullsisë në një vend, në njësinë më të vogël gjeografike, së bashku me informacionin mbi një numër të zgjedhur të karakteristikave demografike, sociale dhe ekonomike të popullsisë. Në mënyrë të ngjashme, Censi i banesave ofron numërimin zyrtar të të gjitha banesave në vend në njësinë më të vogël gjeografike, së bashku me informacionin mbi një numër të zgjedhur të karakteristikave të banesave.
