Shkup, 12 maj – Ka filluar Samiti “Maqedonia 2025” në të cilin marrin pjesë mbi 500 mysafirë – ekspertë ekonomikë, drejtorë të “think- tank”, ish kryeministra dhe ato aktual, ministra nga vendi dhe jashtë vendit, si dhe ekspertë nga komuniteti shkencor nga më shumë vende.
Në fokus është përshpejtimi i rritjes ekonomike, politikat digjitale dhe inovacionet për një ekonomi të gatshme për të ardhmen, harmonizimi i potencialit ekonomik me investime inteligjente, roli i diasporës në rritjen nacionale. Pjesëmarrësit do të diskutojnë gjithashtu për decentralizimin e pushtetit – të ardhmen e parave, medias dhe lirisë digjitale, ridefinimin e strategjive, investimet e huaja direkte, si dhe edukimin e së ardhmes – duke formësuar liderë, mendimtarë dhe inovatorë.
Samiti është hapur nga Viktor Mizo, kryesues i Bordit të drejtorëve i cili paralajmëroi ribrendimin e Maqedonisë 2025.
“Ende ka shumë punë për t’u bërë që Maqedonia të përparojë”, ka thënë Mizo, duke theksuar bashkëpunimin e mirë me Qeverinë.
Në Panelin e parë, “Jashtë politikës: Vizioni ekonomik dhe udhëtimi i lidershipit të kryeministrit Hristijan Mickoski” do të flasë kryeministri i Maqedonisë së Veriut.
Në kuadër të Samitit do të organizohen gjithashtu pesë takime liderësh, dy ngjarje rrjetëzimi dhe tetë trajnime dhe punëtori të veçanta për kompanitë, talentë të rinj dhe institucione qeveritare. Në këto ngjarje do të marrin pjesë folës nga Samiti dhe anëtarë të Bordit të drejtorëve Maqedonia2025. Aktivitetet që lidhen me Samitin do të përfundojnë më 15 maj.