Policia e Maqedonisë së Veriut ka nisur hetimet dhe po merren masa për zbardhjen e një rasti mashtrimi që ka ndodhur dje ndaj një shtetasi zviceran.
Sipas njoftimit të policisë, shtetasi i huaj është mashtruar nga një taksist, i cili i ka kërkuar 7.800 denarë për shërbimin që i ka kryer duke e dërguar nga Qendra në Vodno të mesme.
“Më 14.06.2025 në orën 20:40 në SPB Shkup, B.F.P.H. (43) nga Zvicra ka raportuar se ndërsa udhëtonte me një automjet taksi në linjën nga Qendra në Vodno të Mesme, është mashtruar nga shoferi, i cili i ka marrë 7.800 denarë për shërbimin, dhe pasi që denoncuesi e ka kuptuar se është mashtruar, shoferi i taksisë është sjellë në mënyrë agresive ndaj tij dhe është larguar nga vendi i ngjarjes me automjetin. Po merren masa për zbardhjen e rastit”, njoftuan nga MPB.