Policia e Kosovës ka dhënë detaje lidhur me rastin e të enjtes në mbrëmje, ku në lagjen “Arbëria” (ish-Dragodani) të Prishtinës pati të shtëna me armë zjarri.
Telegrafi ka siguruar mbrëmë pamje nga vendi i ngjarjes, ku shiheshin forca të shtuara të Policisë së Kosovës si dhe automjete të emergjencës shëndetësore në vendin e ngjarjes.
E në raportin 24-orësh të Policisë, sot bëhet e ditur se ngjarja ka ndodhur në ora 23:10.
“Është arrestuar i dyshuari mashkull kosovar pasi që i njëjti dyshohet se kishte shtënë me armë zjarri në drejtim të viktimës mashkull kosovar. Në vendin e ngjarjes janë gjetur dhe sekuestruar 14 gëzhoja si dhe 11 fragmente të predhave”, thuhet në raport.
Lidhur me rastin viktima është dërguar në QKUK për tretman mjekësor, ndërsa nga i dyshuari është sekuestruar një armë zjarri me një karikator dhe tre fishekë.
Pas intervistimit me vendim të prokurorit i dyshuari është dërguar në mbajtje.