Trafik nga Shqipëria, sekuestrohen 35 kg marijuanë në Mal të Zi

Policia kufitare malazeze gjatë kontrollit të një automjeti të një personi nga Tuzi, gjeti 35 kilogramë marijuanë, të dyshuar si të trafikuar nga Shqipëria, ndërsa shoferi E. M, 24 vjec, u arrestua.

Drejtoria e Policisë bëri të ditur se policia kufitare ka kontrolluar një automjet në rrugën Grabon – Dinoshë dhe se droga është gjetur në dy thasë dhe një qese në bagazh. Bëhet fjalë për 62 pako me marijuanë.

Për ngjarjen është njoftuar prokurori i shtetit në Prokurorinë e Lartë të Shtetit në Podgoricë. Drejtuesi i mjetit është arrestuar pasi dyshohet se ka kryer veprën penale të prodhimit dhe trafikimit të paautorizuar të drogës.