Pas një mikpritjeje mbretërore gjatë vizitës së dytë shtetërore në Mbretërinë e Bashkuar, presidenti amerikan, Donald Trump, do të takohet me kryeministrin britanik, Keir Starmer, për bisedime për shumë tema të rëndësishme.
Kreu i Shtëpisë së Bardhë do të takohet me shefin e qeverisë britanike dhe do të diskutojnë së bashku në rezidencën e Starmer.
Bisedimet do të fokusohen kryesisht te tregtia, lufta në Ukrainë dhe Gaza.
Raporti i mirë i Starmerit me Trumpin, i mundësoi shtetit të tij të kishte disa lëshime dhe ai është i interesuar që tarifat prej 25 për qind ndaj aluminit dhe çelikut të ulen në zero.
Megjithatë referuar deklaratave të Trump një marrëveshje mes dy shteteve nuk duket e afërt.
Por Starmer mori një shtysë pozitive kur gjiganti amerikan i kapitalit privat Blackstone tha se planifikon të investojë 123 miliardë dollarë në projekte në Mbretërinë e Bashkuar gjatë dekadës së ardhshme dhe pasi Microsoft kishte bëri të ditur për një plan që përfshin investime deri në 30 miliardë dollarë në Mbretërinë e Bashkuar.
Në anën tjetër, grupi farmaceutik britanik, GSK bëri të ditur se do të investojë 30 miliardë dollarë në SHBA në pesë vitet e ardhshme.
Bisedimet vijnë në një kohë kur Starmer po përballet me probleme politike brenda vendit pasi shkarkoi ambasadorin britanik në Uashington, Peter Mandelson, për shkak të një skandali që kishte të bënte me lidhjet e diplomatit me Jeffrey Epstein i cili ishte dënuar për abuzim seksual.
Një ditë më parë Trump dhe monarku britanik e përmbyllën takimin e tyre me një banket, ku morën pjesë 160 të ftuar, përfshirë anëtarë të familjes mbretërore, sekretari amerikan i Shtetit, Marco Rubio etj.Para darkës, Trump u tha të ftuarve se vizita shtetërore ishte “me të vërtetë një nga nderet më të mëdha të jetës së tij .
Gjatë fjalimit të tij mbreti Charles III lavdëroi “angazhimin personal të Trumpit për të gjetur zgjidhje për disa nga konfliktet më të vështira të botës./vizionplus.tv