Në Komisionin Qendror të Zgjedhjeve u bë sot testimi operacional teknik i Platformës Elektronike të Regjistrimit (PER), e vlefshme për zgjedhësit që votojnë nga jashtë Shqipërisë.
Gjatë prezantimit të platformës, Kryekomisioneri Shtetëror i Zgjedhjeve, Ilirjan Celibashi vlerësoi se KQZ ka përmbushur tashmë të gjitha detyrimet dhe përgjegjësitë që lidhen me realizimin e kësaj platforme.
Celibashi bëri të ditur se platforma siguron regjistrimin e votuesve nga jashtë përmes internetit, pa qenë nevoja të paraqiten në ndonjë zyrë, ambasadë apo konsullatë.
“Platforma gëzon të gjitha cilësitë dhe garanton sigurinë. Kemi ndërtuar një platformë e cila siguron plotësisht identitetin e atij që aplikon. Krahasuar me të ngjashmet e saj, mendoj që përbën standardin më të lartë të sigurisë”, tha Celibashi.
Në këtë drejtim, ai siguroi se në krijimin e platformës janë marrë në konsideratë edhe të gjitha aspektet që lidhen me përdorimin e të dhënave personale dhe mbrojtjen e tyre.
Celibashi theksoi se platforma do të ketë shërbim chatbot (komunikim i drejtpërdrejtë), për të gjithë ata aplikues që nuk janë të familjarizuar me teknologjinë e informacionit.
“Personat e moshuar apo personat që nuk janë të familjarizuar me teknologjinë e informacionit do të asistohen për regjistrim në platformë përmes Whatsapp apo e-mail-it. Për këta persona do të sigurohet komunikim i drejtpërdrejtë”, tha ai.
Celibashi theksoi po ashtu se shqyrtimi i kërkesës për të votuar si votues nga jashtë bëhet 100% në mënyrë automatike.
“Kjo ndodh nëse përputhen të dhënat që ngarkon aplikuesi me databazën e të dhënave që ne kemi në sistem”, tha Celibashi.
Sipas tij, krijimi i llogarisë në platformën PER është vetëm faza e parë, por kushdo që kërkon të regjistrohet si votues nga jashtë duhet të plotësojë disa kushte të tjera.