Shkup, 4 dhjetor – VMRO-DPMNE të shtunën do të mbajë Kongresin e 18-të të partisë, ku mes tjerash do të zgjidhet kryetari i partisë, përcjell TV21. Deri më tani, kandidati i vetëm është lideri aktual i partisë, Hristijan Mickoski. Para disa ditësh, Mickoski në një intervistë deklaroi se kjo do të jetë kandidatura e tij e fundit për kryetar të VMRO-DPMNE-së.
Në kongres do të marrin pjesë 860 delegatë dhe rreth 1.800 të ftuar. Gjithashtu, do të zgjidhet një Komision Statutar dhe një Komision për mbikëqyrjen e punës financiare.
Sipas njoftimeve, në Kongres do të miratohet edhe dokumenti Strategjia Maqedonia 2030, i cili do të shërbejë si udhëzues për drejtimin në të cilin do të lëvizë VMRO-DPMNE si parti qeverisëse.
Shtyllat kryesore të strategjisë do të prezantohen gjatë Kongresit.