Shkup, 23 janar – Avokati dhe ish-gjyqtari Vladimir Tufegxhiq foli ashpër për gjendjen në gjyqësorin maqedonas, duke vlerësuar se problemi kyç nuk është mungesa sistemore e pagave, por ekzistenca e një grupi të vogël, por me ndikim, njerëzish me mentalitet të theksuar kriminal.
Tufegxhiq fillimisht përshëndeti punën e Prokurorisë Publike në luftën kundër korrupsionit dhe bëri thirrje për përgjegjësi më të gjerë shoqërore, veçanërisht nga ata që punojnë në sistemin e drejtësisë si gjyqtarë, prokurorë publikë dhe avokatë.
Ai për “Triling” theksoi se pa mbështetje për prokurorinë nuk mund të ketë përparim thelbësor në zbardhjen e dukurive korruptive.
Duke folur për lëndë aktuale, ndër të cilat edhe rasti i gjyqtarit Gjoko Ristov, në të cilin u gjetën 350.000 euro të murosura në murin e shtëpisë së prindërve të tij, Tufegxhiq theksoi se nuk dëshiron të hyjë në analiza konkrete juridike, duke u thirrur në respektimin e parimit të prezumimit të pafajësisë.
Megjithatë, sipas tij, raste të tilla duhet të hapin pyetje thelbësore se kundër kujt realisht po zhvillohet lufta kundër korrupsionit.
– Ne duhet ta identifikojmë saktë grupin e vogël të njerëzve që janë objektivi i kësaj lufte. Bëhet fjalë për persona me mentalitet kriminal, të cilët edhe me pagë prej 10.000 eurosh do të vazhdonin të bënin të njëjtën gjë – theksoi Tufegxhiq.