Bruksel, 14 mars – Anëtarët e Komitetit të Punëve të Jashtme të Parlamentit Evropian (AFET) të mërkurën do të diskutojnë për Propozim-raportin për progresin e Maqedonisë së Veriut në rrugën e saj evropiane, të përgatitur nga raportuesi special për vendin, eurodeputeti austriak, Tomas Vajc.
Siç bën të ditur PE-ja, duke analizuar progresin e Maqedonisë së Veriut drejt anëtarësimit në BE, Propozim-raporti “njeh hapat që vendi ka ndërmarrë për të adresuar çështjet e ndryshme që pengojnë procesin e anëtarësimit të saj në Union”.
Në dokument gjithashtu apelohet për “progres të shpejtë” të negociatave të pranimit të vendit dhe u bën thirrje të gjithë aktorëve politikë të Maqedonisë “të arrijnë konsensus mbi amendamentet e nevojshme kushtetuese”, ndërsa i kërkon BE-së “ta mbështesë këtë përpjekje”.
Siç njofton korrespondenti i MIA-s nga Brukseli, anëtarët e AFET do të votojnë Propozim-raportin për vendin gjatë muajit maj.
Përveç për vendin, anëtarët e AFET do të diskutojnë edhe raportet e progresit për Shqipërinë, Bosnje-Hercegovinën dhe Moldavinë.
Për raportet për Kosovën, Serbinë dhe Turqinë, AFET diskutoi në mbledhjen e 20 shkurtit.
Në seancën e AFET të martën, eurodeputetët do të shkëmbejnë gjithashtu mendime mbi situatën në Lindjen e Mesme me zëvendëskryeministrin dhe ministrin e Punëve të Jashtme të Sirisë, Ajman Safadi, ndërsa drejtori ekzekutiv i Fondacionit Evropian për Demokraci (EED), Jerzhi Pomjanovski do të prezantojë Raportin vjetor të demokracisë së organizatës për vitin 2024.