Anita Jella do të jetë prokurorja e re që do ti shtohet organikës së SPAK. Të tetë anëtarët e Këshillit të Lartë të Prokurorisë që ishin të pranishëm në mbledhjen e sotme, votuan pro emërimit të Jellës.
Ajo do të ushtrojë detyrën për një mandat 9 vjeçar pa të drejtë riemërimi.
Përzgjedhja e Jellës vjen pas verifikimit që Prokuroria e Posaçme ka bërë dhe ka dorëzuar në raportin finalë pranë KLP.
Komision i Posaçëm për verifikimin e figurës, që përbëhet nga 2 prokurorë të SPAK, një gjyqtar i GJKKO, një punonjës financiar i SPAK dhe një agjent i BKH ka vlerësuar se Jella i plotëson kushtet për të ushtruar detyrën si prokurore e SPAK.
Ajo ka kaluar me sukses kontrollin për pasurinë dhe pastërtinë e figurës dhe mbi të nuk rëndon ndonjë pengesë ligjore për të penguar ngritjen në detyrë. Kujtojmë se Anita Jella që prej 9 majit të vitit 2018 ishte caktuar drejtuese e Prokurorisë së Durrësit.