Shkup, 19 shkurt – Atashetë ushtarake të vendeve të BE-së, NATO-s dhe vendeve tjera, të akredituar në Maqedoninë e Veriut, vizituan Kuvendin Republikan, me ç’rast në Komisionin e Mbrojtjes u shkëmbyen mendime rreth përballjes me krizat botërore. Nga sfidat e sigurisë lind nevoja për më shumë investime në sektorin e mbrojtjes, u tha me këtë rast.
Viteve të fundit vendi ndan buxhet për mbrojtjen rreth 2%, por ShBA-ja vlerëson se buxheti i vendeve evropiane të NATO-s, për mbrojtjen duhet të jetë mbi 5%. Kryetari i Komisionit Kuvendor të Mbrojtjes, Pavle Arsovski, thotë se vendi mund të rrisë buxhetin për mbrojtje deri në 3%.
“Ne jemi serioz për obligimet ndaj NATO-s. Ndajmë aq sa na është thënë zyrtarisht në samitin e Uellsit, mbi 2%. Ministri ynë i mbrojtjes theksoi se mund të punojmë dhe të angazhohemi që të arrijmë deri në 3%, por më shumë se kjo besoj se Maqedonia në këtë moment nuk është në gjendje të ndajë.”, – theksoi kryetari i Komisionit të Mbrojtjes, Pavle Arsovski.
Siguria ka çmim, prandaj nevojitet buxhet më i madh se dy për qind, thotë atasheu kroat.
“Më me rëndësi se sa vend përqindja e buxhetit është përmbajtja dhe kualiteti i ndarjes, si dhe ndryshimi i vetëdijes qytetare se në mbrojtjen dhe sigurinë patjetër duhet të përkushtohemi më shumë në të ardhmen.”, – deklaroi atasheu i Kroacisë, Stjepan Domjançiq.
Atashetë ushtarake u pajtuan se për t’u përballur me sfidat e sigurisë globale, është i nevojshëm bashkëpunim më i madh në planin e mbrojtjes dhe sigurisë, si dhe shkëmbimi i informatave.