Shkup, 21 qershor – Dikur, shërbimet e Higjienës Komunale në Republikën e Maqedonisë së Veriut ishin model për mirëmbajtjen e pastërtisë nëpër qytete. Ishte praktikë e zakonshme që rrugët e qyteteve, përfshirë edhe ato në lagje periferike, të lahen thuajse çdo tri ditë. Ky standard i lartë i higjienës publike kontribuonte jo vetëm në pamjen e pastër të mjedisit urban, por edhe në ruajtjen e shëndetit publik dhe ndjesinë e respektit ndaj qytetarëve, shkruan Zhurnal.mk.
Por realiteti i sotëm është ndryshe. Banorët e lagjes Hasanbeg në Shkup janë të zhgënjyer dhe të revoltuar nga neglizhenca e vazhdueshme e ndërmarrjes publike Higjiena Komunale – Shkup, e cila, sipas tyre, prej muajsh nuk ka ndërmarrë asnjë aktivitet për larjen e rrugëve apo pastrimin sistematik të zonës. Shtresat e pluhurit, mbeturinat që grumbullohen anës rrugëve dhe aroma e rëndë që përhapet në ditët e nxehta janë bërë pjesë e përditshmërisë së kësaj lagjeje.
“Dikur, për çdo tre ditë rrugët lahen, tani mezi i pastrojnë një herë në disa muaj. Lagjja është e mbushur me pluhur dhe mbeturina, dhe askush nuk e ndien për obligim ta zgjidhë këtë problem,” – shprehet një banor i Hasanbegut për Zhurnal.mk.
Sipas tij dhe shumë të tjerëve, kjo mungesë e kujdesit është veçanërisht shqetësuese për fëmijët, të moshuarit dhe për personat me probleme respiratore, të cilët janë më të ndjeshëm ndaj ndotjes së ajrit dhe pluhurit të rrugëve.
Ndërkohë, mungesa e larjes së rrugëve nuk është vetëm çështje estetike, por edhe shëndetësore. Papastërtia e mbledhur në rrugë është një burim potencial për shpërndarjen e sëmundjeve, sidomos në sezonin e verës kur temperaturat janë të larta dhe ndihmojnë në përhapjen më të shpejtë të baktereve dhe viruseve.
Banorët kanë bërë disa ankesa pranë komunës dhe institucionit përgjegjës, por deri më tani nuk ka pasur ndonjë reagim konkret. Ata kërkojnë që shërbimet e pastrimit dhe larjes së rrugëve të kthehen në standardet që dikur ishin praktikë e rregullt dhe jo luks i përkohshëm.
Nëse kjo gjendje vazhdon, banorët paralajmërojnë se do të organizojnë protesta për të ngritur zërin kundër kësaj shpërfilljeje institucionale.
Higjiena e qyteteve nuk është vetëm përgjegjësi e institucioneve, por edhe një tregues i nivelit të kujdesit që shoqëria i kushton jetës së përbashkët. Lagjja Hasanbeg, si pjesë integrale e Shkupit, meriton të trajtohet me të njëjtin respekt dhe kujdes sikurse çdo lagje tjetër urbane.//Zhurnal