Kryetari i grupit parlamentar të Partisë Demokratike, Gazment Bardhi reagoi sot ndaj deklaratës së ambasadorit të Bashkimit Evropian në Tiranë, Silvio Gonzato, i cili shpresonte që opozita do të luante rolin e saj brenda Kuvendit dhe se progresi për të mirën e Shqipërisë nuk është vetëm detyrë e mazhorancës.
“Bëhet thirrje që opozita të luaj rolin e saj brenda Parlamentit; ndërkohë mundësia e opozitës për të hyrë brenda dhe pastaj për të patur mundësi të luaj rolin e saj brenda Parlamentit paraqitet kështu në realitet”, u shpreh Bardhi, i cili ndau në rrjetet sociale, një foto nga deputetët e përjashtuar të opozitës jashtë Kuvendit.
Bardhi theksoi se, “fshehja e realitetit/të vërtetës pas fjalëve të bukura, nuk e ndihmon Shqipërinë! Realiteti/e vërteta është që opozita është përjashtuar nga Kuvendi pa ligj dhe me një rregull që është shfuqizuar prej 6 muajsh nga Gjykata Kushtetuese”.
“Parlamentarizmi ka në themel të tij respektimin e Kushtetutës, si mundësia e vetme e bashkëjetesës mes palëve që mendojnë ndryshe”, nënvizoi Bardhi.