Shkup, 18 qershor – Bashkimi Demokratik për Integrim ka reaguar ndaj mënyrës së shpërndarjes së fondeve për shoqatat qytetare nga Ministria për Marrëdhënie Ndërmjet Bashkësive, e cila udhëhiqet nga zëvendëskryeministri Ivan Stoilkoviq. Nga BDI thonë se sipas të dhënave të publikuara nga mediat, rezulton se janë financuar 29 projekte të shoqatave maqedonase, 5 projekte të shoqatave serbe, 3 projekte të shoqatave rome, dhe vetëm 3 projekte të shoqatave shqiptare.
BDI e cilëson këtë ndarje si një akt të qëllimshëm diskriminues dhe përjashtues ndaj shqiptarëve, të cilët janë një nga komunitetet më të mëdha dhe më aktive në vend.
“Shqiptarët janë sistematikisht fshirë nga lista e përfituesve në një ministri që ka për detyrë të ruajë balancat ndëretnike,” thuhet në reagim.
Partia shqiptare kritikon ashpër edhe rolin e zëvendëskryeministrit Stoilkoviq, duke e akuzuar për qëndrime të njohura anti-shqiptare dhe për përdorim të institucionit shtetëror për qëllime propagandistike dhe ndasi etnike.
“Institucionet nuk janë terren për promovim të etnokracisë së kamufluar,” thuhet më tej në deklaratë, duke nënvizuar se kjo qasje bie ndesh me frymën e Marrëveshjes së Ohrit dhe dëmton bashkëjetesën ndërkomunitare.