Kryetari i Partisë Demokratike, Sali Berisha, në një konferencë për mediet sot theksoi se Partia Demokratike ka si qëllim madhor integrimin e Shqipërisë në Bashkimin Europian.
“Së pari, duhet të garantoj qytetarët shqiptarë se PD si lokomotiva e vërtetë e proceseve integruese e Shqipërisë në institucionet ndërkombëtare, në Këshillin e Europës, në NATO, institucione të tjera, si partia që mori nga Komisioni Europian statusin e kandidatit, ka qëllimin më madhor, integrimin e Shqipërisë në BE”, tha Berisha.
Berisha tha se PD e konsideron këtë proces fund e krye të bazuar në meritë të bazuar në dy shtylla kryesore.
“Në shtetin ligjor funksional, që parakupton liri dhe të drejta të shqiptarëve të garantuara; Parakupton sistem gjyqësor të pavarur nga politika; Parakupton luftë me zero tolerancë ndaj krimit dhe korrupsionit; Parakupton procese gjyqësore të drejta dhe në kohë”, tha Berisha.
“Shtylla tjetër: ekonomia e tregut, funksionale, çka nënkupton para së gjithash garën e ndershme për kompanitë shqiptare e ndërkombëtare; Çka nënkupton prerjen me gërshërët e ligjit të çdo ndikimi të klaneve mafioze, në veprimtarinë ekonomike të Shqipërisë”, shtoi Berisha.
Berisha nënvizoi se procesi i integrimit të Shqipërisë në BE do të jetë i pandalshëm.
“Duke i garantuar ata se “ylli polar” i programit të PD do të jetë interesi kombëtar dhe ai qëndron në integrimin e Shqipërisë në BE”, tha Berisha.