Një ndër shtigjet më të bukura të shënuar së fundi nga Administrata e Zonave të Mbrojtura Durrës është “Falëza e Kishës – Kalaja e Kepit të Rodonit”.
Ky shteg i lehtë dhe i këndshëm ka një gjatësi prej 1.94 km vajtje-ardhje dhe lehtësisht i përshkueshëm për të gjitha moshat.
Shtegu ofron pamje mahnitëse mbi detin, falezën dhe historinë, duke përfunduar te Kalaja e Kepit të Rodonit, një monument me vlera të veçanta kulturore dhe historike.
Kalaja e Kepit të Rodonit vijon të tërheqë turistë vendas e të huaj. Ajo është e ndërtuar në shek. XV dhe sipas dëshmive më të hershme kalaja ka pasur planimetri katrore me katër kulla.
Në ditët e sotme nga fortesa ruhet vetëm kulla qendrore me lartësi 10 metra dhe një pjesë e vogël e mureve. Si rezultat i veprimtarive erozive të ujërave të detit, një pjesë e mureve janë zhytur nën ujërat e detit Adriatik.
Vizitorët mund të shikojnë muret e jashtme të anës së djathtë, të cilat përfundojnë me një kullë të rrumbullakët. Pranë kalasë ndodhen edhe rrënojat e Kishës së Shën Pjetrit, të cilat konsiderohen nga banorët si vend i shenjtë.
