Policia në Ferizaj ka kryer kontroll në shtëpinë dhe prona të tjera të një të dyshuari 70-vjeçar dhe ka gjetur 11 armë pa leje.
Sipas njoftimit të Policisë së Kosovës, aksioni i datës 06.08.2025 u krye në bazë të një urdhërese të Gjykatës Themelore në Ferizaj, e cila është lëshuar me kërkesë të Prokurorisë Themelore.
“Gjatë kontrollit në shtëpinë dhe objektet përcjellëse të të dyshuarit J.I. (M/K), i moshës 70 vjeç, në Ferizaj, janë gjetur dhe sekuestruar gjithsej 8 armë të gjata dhe 3 pistoleta pa leje”- thuhet në njoftimin e Policisë.
Policia ka bërë të ditur se armët ishin shpërndarë në dhoma të ndryshme të shtëpisë dhe në një depo të improvizuar, që dyshohet se përdorej për modifikimin e tyre.
“Po ashtu, janë gjetur pjesë të ndryshme armësh dhe një sasi e konsiderueshme municioni të kalibrave të ndryshëm”- thekson tutje Policia.
Për rastin është njoftuar prokurori i shtetit, i cili ka autorizuar nisjen e procedurave penale ndaj të dyshuarit për dy vepra: “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse” dhe “Fshirja, heqja apo ndryshimi i kundërligjshëm i shenjave në armë zjarri apo në municion”
Policia ka njoftuar se 70-vjeçari është shoqëruar në Stacionin Policor në Ferizaj për intervistim.
“Për veprimet e mëtutjeshme do të njoftoheni përmes një raporti shtesë” – përfundon komunikata e Policisë.