Gjykata e Posaçme kundër Krimit dhe Korrupsionit dënoi me 4 vite burg Alqi Bllakon, dënim që konvertohet me 2 vite e 8 muaj burg me gjykim të shkurtuar dhe dënim plotësues 5 vite heqje e të drejtës së ushtrimit të funksioneve publike.
Mediet raportuan se GJKKO ka marrë vendimin ndërsa Alqi Bllako nuk ndodhej në seancë për arsye shëndetësore, por u përfaqësua nga avokati Eduart Sheko.
Bllako akuzohet nga SPAK për kohën kur mbante detyrën e sekretarit të përgjithshëm të Ministrisë së Mjedisit se u përfshi në dy shkelje korruptive që lidhen me inceneratorin e Tiranës.
Prokuroria e Posaçme kundër Korrupsionit dhe Krimit të Organizuar (SPAK) e dërgoi për gjykim, ish-deputetin e Partisë Socialiste Alqi Bllako, nëntorin e kaluar me akuzat për kryerjen e veprës penale: “Korrupsioni pasiv i funksionarëve të lartë shtetërorë ose i të zgjedhurve vendorë”, dy herë.
SPAK bëri me dije se janë konstatuar akte korruptive të të pandehurit Alqi Bllako, i cili në cilësinë e Sekretarit të Përgjithshëm të Ministrisë së Mjedisit ka kërkuar dhe përfituar në mënyrë të parregullt në dy raste; a. vlerën monetare prej 119.715 euro dhe b. vlerën monetare prej 7,520,000 lekë për Vladimir Bezhanin.