Shkup, 30 gusht – Libra do të ketë për të gjithë nxënësit në shkollat fillore dhe të mesme. Pjesa më e madhe prej tyre, 90 për qind tashmë janë dorëzuar në shkolla, ndërsa të tjerat 10 për qind do të dërgohen në javën e parë të vitit shkollor, deklaroi sot ministrja e Arsimit dhe Shkencës, Vesna Janevska.
Ajo, e cila së bashku me kryeministrin Hristijan Mickoski ishte për vizitë në Kavadar, vlerëson se tema rreth asaj se a do të ketë apo jo libra të këtij viti, duhet të mbyllet.
“Këtë vit, për kënaqësinë e madhe të Qeverisë, por për kënaqësinë më të madhe të nxënësve, mësuesve, prindërve… do të ketë tekste shkollore për të gjitha lëndët nga klasa e parë deri në të nëntën dhe nga klasa e parë deri në të katërtën për të gjithë nxënësit e shkollave të mesme. Në shkollën e mesme profesionale vitin e kaluar kishim rreth një qind të botuara, këtë vit kemi rreth pesëdhjetë tituj të rinj të botuar dhe pesëdhjetë të tjerë të postuar në faqet e internetit në mënyrë që nxënësit të mund të mësojnë. Do t’i jepja fund kësaj teme këtë vit”, tha Janevska.
Do të ketë edhe tekste shkollore për gjuhë të huaja për të gjitha klasat.
Ministrja e Arsimit theksoi se numri më i madh, respektivisht 90 për qind të teksteve shkollore janë dorëzuar, ndërsa rreth 10 për qind do të dorëzohen në javën e parë të vitit shkollor.
“Edhe sot po dorëzohen tekstet shkollore. Me shumë mundësi, do të ketë tekste shkollore që do të dorëzohen në javën e parë të vitit shkollor. Megjithatë, kjo është një çështje e mbyllur. Ato do të arrijnë kudo. Edhe në vendet më të largëta. Edhe 30, edhe 50 kilometra, shkollat malore, deri te të gjitha shkollat rajonale”, tha Janevska.
Të hënën, më 1 shtator, fillon viti i ri shkollor për të gjithë nxënësit e shkollave fillore dhe të mesme në vend.