Prefekti i qarkut të Korçës, Nertil Jole njofton se është neutralizuar edhe vatra e fundit e zjarrit në Parkun Natyror të Gërmenjit.
Prefekti Jole bëri të ditur në një postim në rrjetet sociale se 400 forca zjarrëfikëse dhe 80 mjete janë angazhuar për neutralizimin e vatrave të zjarrit në Parkun Natyror të Gërmenjit, nga data 11 gusht deri më sot.
Ai vlerësoi angazhimin e strukturave të bashkisë Kolonjë, punonjësve të Drejtorisë Rajonale të Zonave të Mbrojtura, Policisë Kufitare dhe të Rendit, forcave të ushtrisë, si dhe vullnetarëve nga komuniteti, të organizuar nga pronari i një bujtine të zonës “Ferma Sotira”.
“Kontributi i tyre i përditshëm ka qenë i rëndësishëm në këtë përpjekje jo të thjeshtë për të mbrojtur parkun”, u shpreh prefekti.
Ai theksoi se mbrojtja e natyrës dhe e pasurive të përbashkëta është detyrë e të gjithëve, duke nënvizuar nevojën për kujdes dhe përgjegjshmëri maksimale.
Jole tha se sipas Policisë, për periudhën Korrik-Gusht, janë regjistruar 11 raste zjarrëvënie, 2 të arrestuar, 8 të proceduar. Dua të nënvizoi faktin se zjarrëvënia e qëllimshme është vepër penale. Qytetarët duhet të kenë nivelin e maturisë dhe përgjegjësisë maksimale”, përfundoi ai.