Shkup, 9 maj – Liderët e VLEN-it pritet të takohen sot, pas çka pritet të caktohen grupet e punës për bisedime për anëtarësim në qeveri. Bilall Kasami nga VLEN thotë se gjatë javës tjetër pritet të nisin bisedimet për formimin e qeverisë së re. I pyetur nëse ai personalisht do të marrë funksion në ekzekutiv, Kasami tha se do të vazhdojë punën si kryetar i komunës së Tetovës.
“Brenda kësaj jave do të duhet t’i kemi të gatshme grupet e punës dhe nëse jo, për vikend me siguri nga e hëna mund të nis formalizimi edhe i takimeve dhe koordinimit të aktiviteteve rreth formatimit të qeverisë. Sigurisht që edhe çështjet kadrovike do të vijnë në fazën e dytë të bisedimeve për t’u diskutuar, sa i përket zgjidhjes time, vetë qytetarët e Tetovës treguan se mua më pret edhe shumë punë në Tetovë të cilat janë hapur dhe që duhet vazhduar”, tha mes tjerash Kasami.