Kadastra Shqiptare njoftoi sot se garanton sigurinë juridike në zbatim të vendimit të marrë nga qeveria të enjten për kompensimin financiar të qytetarëve, për tokat e zëna nga ndërtimet informale.
“Si asnjëherë më parë 2153 pronarë do të kompensohen financiarisht për ndërtimet e legalizuara në tokën e tyre. Këshilli i Ministrave ka miratuar vendimin për kompensimin e këtyre subjekteve, pasuria e të cilëve është zënë nga ndërtimet informale”, thuhet në njoftimin për shtyp të Kadastrës Shqiptare.
Me botimin në fletoren zyrtare të këtij vendimi, çdo qytetar i titullit të pronësisë së objektit, i përfshirë në këtë proces, mund të vijojë me blerjen e parcelës ndërtimore të shpronësuar për të siguruar pronësinë e plotë mbi objektin dhe truallin.
Sipas Kadastrës, vlera totale e kompensimit është 1 miliard e 11 milionë lekë; Sipërfaqja e përfshirë është 88.358,4 m²; Prona që shpronësohen janë 420; Pronarët përfitues janë 2153 qytetarë; Pronarë objektesh të legalizuara, përfitues të parcelës ndërtimore janë 386.
Agjencia Shtetërore e Kadastrës do të kryejë ndryshimet përkatëse në regjistrat e pasurive të paluajtshme, duke garantuar siguri juridike për të gjithë palët e përfshira.
Kadastra bën të ditur se, përfituesit nga shpronësimet në drejtoritë vendore ASHK – Tiranë Veri, Tiranë Jug, Tiranë Rurale 1, Tiranë Rurale 2, Kamëz-Vorë, Lezhë, Durrës, Elbasan, Pogradec, Sarandë, Gjirokastër, Shkodër, Korçë, Kukës, Vlorë, Fier dhe Zonat e Stimuluara, mund të ndjekin procedurën pranë Agjëncisë së Trajtimit të Pronave, për përfitimin e vlerës përkatëse.