Kremlini njoftoi sot se presidenti rus, Vladimir Putin kishte pranuar disa propozime të SHBA-së për t’i dhënë fund luftës në Ukrainë dhe kishte hedhur poshtë disa pika të tjera të planit të paqes, sipas “Reuters”.
Zëdhënësi i Kremlinit, Dmitry Peskov tha gjithashtu, se Rusia ishte gati të takohej me negociatorët amerikanë për të arritur një marrëveshje.
Deklarata e Peskov erdhi pas bisedimeve dje në Moskë midis presidentit rus, Vladimir Putin dhe të dërguarit të posaçëm të presidentit të SHBA-së Donald Trump, Steve Witkoff, dhe dhëndrit të tij, Jared Kushner.
Peskov u tha gazetarëve se do të ishte gabim të thuhej se presidenti rus, Putin kishte hedhur poshtë propozimet e SHBA-së, duke vënë në dukje se takimi ishte shkëmbimi i parë ballë për ballë i opinioneve mbi propozimet.
“Presidenti rus Vladimir Putin ka pranuar disa nga propozimet dhe ka kundërshtuar disa pika të tjera – në një proces normal negociatash”, theksoi Peskov.