Shkup, 2 korrik 2025 – Një delegacion i lartë i Bashkimit Evropian, i kryesuar nga znj. Silvija de Jakovo, menaxhere e programeve në Drejtorinë për Zgjerim dhe Fqinjësi Lindore (ENEST) – zhvilloi sot një vizitë zyrtare në Komunën e Haraçinës, në kuadër të vlerësimit të projekteve me mbështetje evropiane në Ballkanin Perëndimor.
Delegacioni, i cili përfshinte edhe zëvendësdrejtorin dhe këshilltarë të BE-së, vizitoi kantierin ku po ndërtohet Qendra për Selektim të Mbeturinave, projekti i parë i këtij lloji në të gjithë Maqedoninë e Veriut.
“Kjo vizitë përfaqëson një moment tejet të rëndësishëm për komunën tonë. Haraçina është zgjedhur si komunë model nga një delegacion i lartë që viziton rajonin. Ky vlerësim na mbush me krenari dhe është dëshmi e angazhimit tonë të vazhdueshëm”, ka bërë ë ditur kryetari i komunës Ridvan Ibrahimi.
“Jam i lumtur që puna jonë e palodhshme ka arritur të vlerësohet edhe në Bruksel. Këtë vlerësim e konfirmuan edhe vetë mysafirët tanë gjatë takimit. Në emrin tuaj, i shpreha falënderime znj. Silvija de Jakovo për mbështetjen dhe bashkëpunimin e deritanishëm me Bashkimin Evropian, përmes projekteve ndërkufitare me vendet fqinje”.
Ai ka theksuar se gjatë takimit, delegacionin e ka njoftuar për sfidat kryesore me të cilat përballet komuna, përfshirë furnizimin me ujë të pijshëm, trajtimin e ujërave të zeza dhe çështjen e ujit për ujitje.
“Delegacioni shprehu interes të veçantë për këto çështje dhe kërkoi informacione të detajuara. Mbështetja që na u premtua nga miqtë tanë nga Brukseli na motivon edhe më shumë për të vazhduar përpjekjet në këto drejtime. Së bashku vizituam edhe kantierin e punimeve, ku konstatuam progresin e mirë të projektit. U dakorduam që dinamika e punës të intensifikohet, me qëllim që kjo qendër moderne për selektim mbeturinash të vihet sa më shpejt në funksion”, ka theksuar kryetari Ibrahimi.