Shkup, 31 maj – Puna e parë që Arben Taravari ndërmori pas marrjes së detyrës si Ministër i Shëndetësisë në korrik të vitit 2024, ishte ndërprerja e një konkursi të madh për punësimin e mbi 1000 personave në sistemin shëndetësor të vendit, shkruan IN7.
Konkursi ishte shpallur nga ish-ministri Ilir Demiri gjatë mandatit të qeverisë së kaluar dhe kishte arritur në fazën finale – atë të testimit. Por menjëherë pas zgjedhjeve të 8 majit 2024, dhe pas emërimit të Taravarit në krye të shëndetësisë, një urdhër u lëshua nga kabineti i tij përmes emailit, duke i kërkuar drejtorëve të spitaleve dhe klinikave që të ndërpresin çdo procedurë për konkursin dhe procesin e punësimeve.
Pavarësisht premtimeve të përsëritura nga Taravari se do të hapen konkurse të reja, një gjë e tillë nuk ndodhi asnjëherë.
Ndërkohë, situata në terren po rëndohet çdo ditë e më shumë. Sot në Tetovë, dhjetëra motra medicinale protestuan para spitalit, duke denoncuar se për vite me radhë nuk u është paguar sigurimi shëndetësor, ndërsa prej tre muajsh nuk kanë marrë as pagat.
Ministri Taravari, në një deklaratë për mediat, fajësoi koalicionin VLEN, duke thënë se “ata nuk e kanë lejuar të zgjidhë problemin”.
Protestat dhe pakënaqësitë në sektorin shëndetësor po rriten, ndërsa mungesa e zgjidhjeve konkrete vazhdon të rëndojë gjendjen e punonjësve dhe pacientëve.