Shkup, 26 prill – Arkitekti Mishko Ralev është zgjedhja më e preferuar për kandidatin e LSDM-së për kryetar komune të Shkupit në zgjedhjet lokale të vjeshtës, raportoi TV 24.
Ralev është Dekan i Fakultetit të Arkitekturës dhe Dizajnit në Kolegjin Amerikan të Universitetit të Shkupit dhe President i Shoqatës së Arkitektëve të Maqedonisë (AAM). Gjatë kohës së Dimitar Kovaçevskit si kryetar i partisë, ai ishte anëtar i Bordit Ekzekutiv të LSDM-së.
Sipas informacioneve, LSDM-ja edhe një herë do t’i propozojë kryetarët aktualë – Goran Gerasimovski në Qendër, Tome Hristovski në Krushevë, Sashko Mitovski në Kriva Pallankë dhe Sashko Komnenoviq në Çucer Sandevë, ndërsa sipas rezultateve të sondazheve mbështetje do të marrë në Strumicë Kostadin Kostadinov.
LSDM i tha stacionit televiziv se organizatat komunale të partisë kanë paraqitur emra të propozuar, mbështetja e të cilëve do të matet ende në sondazhe.