Shkup, 10 dhjetor – Ministria e Punëve të Brendshme ka konfirmuar sot se ka dorëzuar një kallëzim penal ndaj ish-ministrit të Brendshëm, Oliver Spasovski, për veprime që dyshohet t’i kenë shkaktuar buxhetit të shtetit dëm të konsiderueshëm financiar.
Sipas njoftimit zyrtar të MPB-së, ndaj Spasovskit rëndon dyshimi për keqpërdorim të detyrës dhe autorizimeve zyrtare, me ç’rast buxheti i shtetit është dëmtuar në vlerë prej 5.565.927 denarësh.
“Gjatë ushtrimit të funksionit të tij si ministër i Brendshëm, gjatë vitit 2021, O.S. ka shfrytëzuar pozitën dhe autorizimet zyrtare për t’i mundësuar një subjekti juridik – për kontroll teknik në komunën Saraj – të përfitojë pasuri në mënyrë të kundërligjshme në shumën prej 5.565.927 denarë”, thuhet ndër të tjera në njoftimin e MPB-së.
MPB njofton se materialet e mbledhura janë dorëzuar në Prokurorinë kompetente për procedurë të mëtejshme.(INA)