Shkup, 5 qershor – Ministri i Punëve të Jashtme dhe Tregtisë së Jashtme, Timço Mucunski, sot do të qëndrojë për vizitë pune në Paris, Republikën Franceze.
Vizita, siç informojnë nga MPJdheTJ, do të fillojë me takimin me homologun e tij, ministrin për Evropë dhe Punë të Jashtme të Republikës Franceze, Zhan-Noel Baro, pas së cilës pason takimi i punës me Benxhamin Hadad, ministër i deleguar për Evropën.
Në kuadër të vizitës, Mucunski, siç është paralajmëruar, do të realizojë takim edhe me Bertran Bishvalter, këshilltar për Evropën kontinentale dhe Turqinë e presidentit të Republikës Franceze, Emanuel Makron.
Në fokus të bisedimeve, theksojnë nga MPJdheTJ, do të jenë përparimi i mëtejshëm i marrëdhënieve dypalëshe, riafirmimi i mbështetjes franceze për procesin eurointegrues të vendit tonë, si dhe shkëmbimi i mendimeve për çështjet aktuale rajonale, evropiane dhe globale.