Shkup, 3 dhjetor – Me rastin e Ditës Ndërkombëtare të Personave me Nevoja të Veçanta, kryetari i Kuvendit të Maqedonisë së Veriut, Afrim Gashi, priti në një takim simbolik fëmijët e Shkollës Fillore “Adem Jashari” nga Çairi. Vizita u zhvillua në ambientet e Kuvendit dhe synoi të nënvizojë përkushtimin institucional për krijimin e mundësive të barabarta për të gjithë qytetarët.
Gashi theksoi se ky takim ishte një moment i vlefshëm reflektimi mbi sfidat dhe nevojat e personave me aftësi të kufizuara, duke theksuar se ndërtimi i një shoqërie më të hapur dhe më gjithëpërfshirëse kërkon angazhim të përbashkët.
“Sot na kujtohet se fuqizimi dhe integrimi i personave me nevoja të veçanta nuk është vetëm detyrë e institucioneve, por përgjegjësi kolektive që na angazhon të gjithëve”, deklaroi kryeparlamentari.
Ai shtoi se Kuvendi mbetet i përkushtuar të sigurojë pjesëmarrje të plotë dhe të barabartë të çdo individi në jetën shoqërore, duke e konsideruar diversitetin si një nga vlerat themelore të shoqërisë.
Takimi u mbyll në atmosferë të ngrohtë, ku fëmijët patën mundësi të njihen nga afër me institucionin më të lartë ligjvënës të vendit.
