Dega e Lidhjes së Historianëve të Kosovës “Ali Hadri” në Deçan ka shprehur shqetësimin e saj për faktin se edhe në mbledhjen e 41-të të Kuvendit të Republikës së Kosovës nuk u arrit konstituimi i tij dhe vazhdimi i punimeve parlamentare, pavarësisht vendimit të Gjykatës Kushtetuese dhe takimeve konsultative të Presidentes së Republikës, Vjosa Osmani-Sadriu, me përfaqësuesit politikë.
Në reagim thuhet se ky bllokim i vazhdueshëm i Kuvendit përbën shkelje serioze të rendit kushtetues, paralizon funksionimin e institucioneve demokratike dhe minon besimin qytetar ndaj sistemit përfaqësues.
“Është e qartë se pa vullnet të sinqertë politik dhe marrëveshje ndërmjet akterëve institucionalë, vendi nuk mund të dalë nga kjo krizë.
Kuvendi i Kosovës, si organi më i lartë përfaqësues dhe legjislativ, nuk guxon të jetë peng i interesave të ngushta partiake apo i kalkulimeve politike afatshkurtra. Në këtë rrethanë, mosrespektimi i afateve kushtetuese dhe i vendimeve të gjykatave është i papranueshëm dhe i rrezikshëm për stabilitetin institucional”, thuhet tutje.
Lidhja e Historianëve thekson tutje se duke pasur parasysh se tashmë kemi hyrë në gjashtëmujorin e dytë të vitit, kur zakonisht nis procesi i hartimit të projektbuxhetit për vitin 2026, dhe gjithashtu jemi përballë një vakumi të pritshëm institucional, meqë Presidentja e re e Republikës duhet të zgjidhet në fillim të vitit 2026, ndërkohë që kanë nisur përgatitjet për zgjedhjet lokale, Kosova po rrëshqet drejt një paralize të plotë institucionale.
“Kjo situatë e pazgjidhur paralizon funksionimin normal të shtetit, bllokon vendimmarrjen dhe dëmton perspektivën demokratike dhe zhvillimore të vendit.
Përballë kësaj gjendjeje, i bëjmë thirrje Presidentes së Republikës që të shqyrtojë seriozisht shpalljen e gjendjes së jashtëzakonshme, si një masë kushtetuese për mbrojtjen e rendit demokratik, të sigurisë institucionale dhe të interesit publik”, thuhet në reagim.