Delegacioni i Kosovës është duke kryer përgatitjet e fundit për ditën e marte, ku në Asamblenë Parlamentare të Këshillit të Evropës do të hidhet në votim raporti i Dora Bakoyannis, ku rekomandohet anëtarësimi i Kosovës në KiE.
Besnik Tahiri, pjesë e delegacionit të Kosovës ka shpërndarë disa fotografi, ku ka falënderuar raportuesen Bakoyannis për punën e bërë, transmeton Telegrafi.
“Takimi u mbyll me një diskutim të hapur mbi aplikimin e Kosovës në Këshillin e Evropës. Raportuesja Dora Bakoyannis prezantoi gjetjet kryesore të raportit. Ne, delegacioni i Kosovës e falënderuam për punën e madhe dhe qasjen e paanshme dhe profesionale në këtë detyrë sfiduese”, shkruan Tahiri në platformën “X”.
Sot gjatë ditës edhe ministrja e Punëve të Jashtme, Donika Gërvalla ka thënë se janë duke kryer përgatitjet e fundit, dhe se nesër presin një votim të suksesshëm.
Nesër, më 16 prill, Asambleja Parlamentare e Këshillit të Evropës me 2/3 e votave të të gjithë deputetëve të pranishëm nga të gjitha shtetet anëtare, voton rekomandimin për Këshillin Ministror për anëtarësimin e Republikës së Kosovës në KiE. Një votim i suksesshëm nesër pasdite do të hapte rrugën për hapin final, vendimin e Këshillit Ministror, i cili mundësinë e parë për ta vendosur në agjendë anëtarësimin e Kosovës do ta kishte më 16 maj, kur Këshilli i Evropës shënon 75-vjetorin e themelimit”, ka pohuar Gërvalla.
Kosova ka aplikuar për anëtarësim në Këshillin e Evropës më 12 maj 2022. Ndërkaq, më 24 prill u shënua hapi i parë i suksesshëm për Kosovën me vendimin e Komiteti Ministror i Këshillit të Evropës.
Këshilli i Evropës është organizatë lidere në Evropë në fushën e të drejtave të njeriut.
Pjesë e tij janë 46 shtete, përfshirë 27 vende anëtare të Bashkimit Evropian dhe të gjitha vendet e rajonit.