Shkup, 29 maj – Drejtori i Drejtorisë për ekzekutimin e sanksioneve, Aleksandar Pandov sot në konferencë për shtyp e përshëndeti vendimin e gjykatëses Daniella Dimovska për të mbajtur gjykimin për lëndën “Aditivët” në gjykatën digjitale në Idrizovë. Theksoi se bëhet fjalë për një sallë gjyqi evropiane, e cila meriton të përdoret shumë më shpesh, dhe u bëri thirrje të gjithë gjykatësve ta përdorin atë për raste më të mëdha, përfshirë edhe rastin me zjarrin në diskotekën “Puls” në Koçan.
“Kjo sallë gjyqi u ndërtua në vitin 2020. Gjykimi i parë u mbajt dy vjet më vonë, në vitin 2022, dhe që atëherë, për fat të keq, deri më sot, kjo sallë gjyqi ka qenë e zbrazët. Kjo sallë gjyqi është nën Drejtorinë për zbatimin e sanksioneve, por para së gjithash, të Republikës së Maqedonisë. Nuk e di sa herë keni pasur mundësinë ta shihni sallën e gjyqit, kjo është një sallë gjyqi evropiane dhe meriton të përdoret shumë më shpesh”, tha Pandov.
Ai vuri në dukje se salla e gjyqit është në gjendje të shkëlqyer dhe gjithçka që mungonte nga ana teknike tani është riparuar. Pandov paralajmëroi se deri në fund të vitit ose në fillim të vitit të ardhshëm, do të fillojë ndërtimi i fazës së dytë të burgut të Idrizovës, i cili ndodhet pranë kësaj salle gjyqi.
“Edhe rruga hyrëse është zgjeruar, kështu që mendoj se në të ardhmen dëshiroj dhe besoj që kjo sallë gjyqi të përdoret shumë më shpesh. Gjelbërimi që shihni 50 metra nga vetë salla e gjyqit është planifikuar për ndërtimin e fazës së dytë të burgut të Idrizovës, të cilin shpresoj sinqerisht se do të fillojë deri në fund të vitit, nëse jo në fillim të vitit të ardhshëm. Aty do të vendoset qendra e paraburgimit, do të ketë 420 shtretër për 420 të dyshuar. Do të jetë ideale për të gjitha gjykimet e tjera, jo vetëm gjykime të mëdha, por edhe gjykime më të vogla, në mënyrë që të mos ketë nevojë të bëhen procesione nga Shutka ose Kumanova ose ndonjë qytet tjetër deri në Gjykatën Penale, por menjëherë pranë vetë sallës së gjyqit do të jetë qendra kryesore e paraburgimit të shtetit”, shtoi Pandov.
Ai vuri në dukje se tashmë janë siguruar të gjitha lejet e nevojshme dhe paratë nga Banka për Rindërtim dhe Zhvillim.
“Paratë ishin të ngrira, sepse jemi nën monitorim të vazhdueshëm nga Komiteti për luftë kundër torturës, i cili është pjesë integrale e Këshillit të Evropës. Ata kishin një numër të madh të vërejteve për punën e burgjeve të Maqedonis, Drejtorinë për Ekzekutimin e Sanksioneve, dhe paratë tona nga kredia ishin nën moratorium. Ne i kishim në llogarinë tonë, por nuk mund të përdoreshin. Tani janë zhbllokuar”, tha Pandov.
Në pyetjen e gazetarëve nëse është e mundur në këtë gjykatë të mbahet edhe gjykimi për rastin me zjarrin në Koçani, Pandov përmendi se sinqerisht beson dhe për këtë arsye u dërgoi një apel gjyqtarëve që do ta trajtojnë atë rast.
“Unë në atë emër edhe po drejtohem tani, si thirrje për çdo gjykatës. Nuk e di kush do të jetë gjykatësi në atë rast, por besoj sinqerisht se do të zhvillohet këtu”, shtoi Pandov.