Në Himarë, babagjyshi ka ardhur nga deti, për ta shndërruar ditën e shenjtë të Krishtlindjes, në një festë magjike të mbushur me dhurata për fëmijët e qytetit bregdetar.
Kryeministri Edi Rama ndau sot në rrjetet sociale pamje nga atmosfera festive buzëdetit. Në pamjet e ndara nga kreu i qeverisë shquhet babagjyshi që i afrohet bregut të detit, ku pritet nga qindra fëmijë të Himarës, si dhe kryebashkiaku Vangjel Tavo, i cili përcolli edhe mesazhin e urimit për qytetarët e Himarës.
Tavo tha se dita e sotme do të jetë e mbushur me plot aktivitete festive për fëmijë dhe të rritur.
“Në këtë ditë të shenjtë të Krishtlindjes, ditën e shpresës e gëzimit, ju presim në një maratonë festive që nis në orën 10:00 me paradën e babagjyshëve e kulmon në koncertin e madh në orën 18:00”, u shpreh Tavo.
Ndër aktivitetet e parashikuara është edhe Oda Himarjote, ku parashikohet mbajtja e panairit të artizanatit, poçerisë dhe kulinarisë.