Kryeministri Edi Rama priti sot në një takim kryeministrin e Mbretërisë së Spanjës, Pedro Sánchez, i cili ndodhet në Tiranë në kuadër të Samitit të Komunitetit Politik Evropian.
Kryeministri Rama ndau në rrjetet sociale pamje nga ky takim në selinë e Kryeministrisë, ndërsa bëri të ditur se u diskutua për thellimin e marrëdhënieve dypalëshe mes Shqipërisë dhe Spanjës.
Po ashtu, Rama informoi se temë e bisedës ishte edhe bashkëpunimi ekonomik dhe mbështetja e vazhdueshme e Spanjës për integrimin europian të Shqipërisë.
“Me kryeministrin e Mbretërisë së Spanjës, Pedro Sánchez, një takim miqësor e i rëndësishëm për thellimin e marrëdhënieve dypalëshe mes Shqipërisë dhe Spanjës, bashkëpunimin ekonomik, dhe mbështetjen e vazhdueshme të Spanjës për integrimin europian të Shqipërisë”, u shpreh Rama.
Më herët sot kryeministri Rama priti në një takim Sekretarin e Përgjithshëm të NATO-s, Mark Rutte.
Samiti i gjashtë i Komunitetit Politik Europian nis sot punimet në Tiranë nën logon “New Europe in a new world”, duke shënuar takimin e tij për herë të parë në Ballkanin Perëndimor me pjesëmarrjen e liderëve, kryetarë shtetesh dhe qeverish nga 47 vende europiane, së bashku me drejtuesit e institucioneve kryesore evropiane dhe ndërkombëtare.
Mikpritësi i Samitit, Kryeministri Edi Rama do të zhvillojë gjatë ditës takime dypalëshe me 10 prej personaliteteve pjesëmarrëse në këtë samit, si dhe do të mirëpresë me takime duarsh të gjithë liderët e ftuar në Samit me të cilët do të ketë edhe një foto familjare.
