Sot me fillim nga ora 11:00 do të vazhdojë seanca konstituive e Kuvendit të Kosovës.
Kjo pas publikimit të aktgjykimit të Gjykatës Kushtetuese që u bë të hënën që solli edhe rregulla të reja.
Sipas aktgjykimit të Gjykatës Kushtetuese, Kuvendi duhet të zgjedhë kryetarin e tij përmes votimit të hapur, brenda 30 ditësh, me jo më shumë se tri raunde votimi për të njëjtin kandidat.
Nga e hëna ka nisur edhe rrjedhja e afatit kushtetues prej 30 ditësh për formimin e legjislaturës së nëntë.
Mbetet të shihet nëse palët do të lëvizin nga pozicionet e tyre të mëparshme, apo gjendja do të mbetet e njëjtë.
Lidhur me këtë dje është deklaruar presidentja e Kosovës Vjosa Osmani.
Osmani ka vlerësuar se konstituimi i Kuvendit është një urgjencë shtetërore, duke theksuar rëndësinë e krijimit të institucioneve të reja në këtë periudhë sfidash globale dhe zhvillimesh të ndjeshme rajonale.
Ajo theksoi se zvarritja e procesit deri më tani ka dëmtuar jo vetëm besueshmërinë e institucioneve dhe zhvillimin e brendshëm, por edhe pozicionin ndërkombëtar të Kosovës.